【Now財經台】茶飲股奈雪的茶(02150)今日(26日)股價大升，高開2%後，升幅不斷擴大，最多升44%，高見1.92元，衝上4個月高位，成交股數較過去100日同時段平均成交增8倍，全日成交金額逾3.6億元。
集團今日開市前宣布，鄧彬因需要發展其他個人事務，唔再出任執行董事及首席營運官，即日生效，雖然出現高層人事變動，但奈雪股價照爆升，可能係市場憧憬今次換人，可唔可為公司帶嚟新景象。
此外，經營蜜雪冰城嘅蜜雪集團(02097)，公開招股今日截飛，超額認購逾5000倍，可能帶挈埋影子股奈雪炒上，但14天RSI已升至近80嘅超買水平，短線可能有回套壓力，要留意新管理層上任後有咩動作。
