【now.com財經】「內捲風暴」橫掃內地各行各業，茶飲業係其中一個「重災區」，其中，表明拒絕「低價內捲」嘅喜茶，半年前突叫停加盟店申請，又批評消耗消費者喜愛，危害行業根基。至於今年上半年蝕過億嘅奈雪的茶(02150)暗示要考慮「出海」救亡。
另一個星級茶飲品牌霸王茶姬，截至今年上半年止，喺全球有逾7000家門市，遍及美國、泰國、新加坡、馬來西亞、香港等，而海外市場已逐漸成為集團發展及增長引擎，更值得留意係，集團係少數未有參與「外賣大戰」嘅茶飲新貴，集團主席兼CEO早前表明「唔會以價格換市場」。
不過，霸王茶姬有個「估佢唔到」嘅新搞作，就係殺入時裝界。
一向眼利嘅內地網民近日發現喺淘寶Search「霸王茶姬衣服」，就會彈出大量產品圖片，當中包括一個名為「踏雪歸來系列」，圖案同公司嘅茶飲杯差唔多，產品包括牛仔褸、tee、手袋、絲巾等，更有傳媒話「唔知仲以為係國際名牌」，到底係搞噱頭，吸引消費者注意，當做另類宣傳，還是集團覺得唔可以「只專心賣茶」，業務要多元化以應對今日艱難嘅市道。
有內地網民就話，茶飲品牌出周邊產品見怪不怪，但賣衫真係未見過，又指公司已變了「霸王百貨公司」，賣茶只係副業，更大嘆內捲已捲到咁嘅地步。
