【Now財經台】DeepSeek發展引起全球關注，更引發內地人工智能(AI)概念股重估，其中，阿里巴巴(09988)月初至今已累升60%，值得留意係，代表傳統經濟嘅內房股，今日(26日)都有得升，當中包括內地地產代理貝殼(02423)，但整體內房股表現其實仍然低迷，今次由內地AI概念股引發嘅估值重估潮，內房股有冇機會受惠？
廣東省地產商會副會長尹德輝認為，投資者可以留意物管股，又話港股同A股嘅物管股好唔同，內地物管公司會提供美容、訂車、購物等服務，呢類企業著重後續服務，反觀本港物管公司只著重收管理費，所以港股嘅物管股就冇乜動靜。
佢又話，其實地產行業都可以應用AI，例如用無人機驗樓及起樓等，不過，由買地開始，到貸款、設計、起樓、入伙住，呢個過程就未必會用到AI，所以受惠機會唔大。不過，貝殼呢類地產中介嘅交易，過程全部可以喺網上完成，唔需要人手管理，反而可以借助AI減省人手，加快交易進程，對貝殼呢類公司好有利。
