【Now財經台】新意網集團(01686)股價今日(14日)一度飆逾35%，高見6.6元，衝上兩年半高位，成交亦急增，暫時成交金額逾4億元，近期不斷有資金追入新意網，估計係受惠於近期嘅DeepSeek熱潮，新意網升勢可唔可以持續？
王道資本及家族資產管理執行董事黃敏碩指，雖然集團冇公布接入DeepSeek，但近排市場都傾向追捧有利AI應用嘅股份，而新意網作為本地最大數據中心服務商，本身已具備相關條件及空間發展AI，但集團嘅服務範疇以本地為主，所以整體爆發力未必太强，呢兩日股價急升可能係之前市場忽略咗佢，依家借勢炒返高，所以相比內地相關股份，本地相關股份求穩係冇問題，但未必有爆炸性突破或業務發展。
Michael又認為，新意網本身盈利增長平穩，未來可以留意集團會唔會趁勢拓展新客群，但由於本地市場相對飽和，所以要留意集團服務嘅內地客戶，例如三華電訊商已全面接入DeepSeek AI技術。
