【Now財經台】市傳蘋果公司(Apple Inc.)揀咗阿里巴巴(09988)，內地iPhone會用阿里嘅人工智能(AI)功能，雖然兩家公司暫時仲未確認呢個消息，但其實都有好多不確定性，今次合作係咪一個雙贏局面？
南華金融集團副總裁莫灝楠指，所謂共同開發，其實係因為Apple冇自家大型語言模型(LLM)，想進軍大中華市場就需要同當地公司合作。對科技公司嚟講，平台係幫佢哋推廣自家模型嘅一個好方法，因為單靠自己去搵客係好難，再加上行業競爭激烈。不過，Apple手上有龐大客戶，相信可以喺今次合作中佔主導地位。
Casper續指，其實阿里本身都面對唔少問題，因為電商市場開始萎縮，加上金融及物流業務都唔賺錢，但勝在估值低及現金多。佢又話，是次合作可能幫到阿里趕上AI熱潮，食到啲AI概念，但對集團中長線發展未必有好大幫助。
