【Now財經台】美國總統特朗普(Donald Trump)喺佢上任第2日話，考慮緊喺下個月加中國貨10%關稅，港股今日(22日)顯著受壓，個股方面，途虎(09690)股價今日比大市跌得更甘，股價今朝以暫時高位，輕微高開0.1%後，急速下滑，一度大跌逾16%，低見14.36元，成交股數較過去100日同時段增9倍，中午前成交金額逾1.45億元。
摩根士丹利發報告唱淡途虎，雖然公司市佔率有得升，但估計2024年下半年盈利會少過上半年，大摩除咗下調集團盈利預測外，並下調目標價至22元。
途虎今日即市低位同上市價28元比較已經「腰斬」，不過，由於相對强弱指數(RSI)已跌至20樓下嘅極超賣水平，短線有機會出現技術性超賣反彈。
途虎財務尚算穩健，有條件做回購支持下股價，但值得留意係，依家騰訊控股(00700)持有途虎A類股份近20%，由於唔係騰訊核心業務，隨時有被減持風險。
