【Now財經台】中煙香港(06055)股價今日(21日)平開，之後愈升愈有，午後一度大升近11%，高見24.7元，連升第3個交易日，全日成交金額逾1.1億元，成交股數較過去100日同時增50%。
國金證券首次出報告唱好中煙，指公司負責獨家經營煙葉入口，預期內地雪茄需求增加，高端煙葉入口有望顯著增加，給予「買入」評級及32.2元目標價，呢個可能係中煙股價今日大升嘅原因。
中煙喺2024年12月發盈喜，預料去年多賺最少30%，不過，去年下半年增長會小過上半年嘅40%，消息公布後，冇對股價有太大支持，仲反覆回落至上周一(13日)嘅100天線水平，中煙股價今日突然衝高，升穿10天及20天線外，亦一度衝破50天線，但最終企唔穩。
