【Now財經台】內地2024年起，喺最少6個地區或省份推手機「以舊換新」補貼政策，昨日(20日)開始擴至全國，單件售價唔超過6000人仔嘅產品，可以獲15%補貼，每人補貼上限500人仔，手機設備股今日(21日)跑出，舜宇光學科技(02382)、小米集團(01810)都係表現強勢嘅藍籌。據京東集團(09618)平台最新數據顯示，手機銷量較政策落地前飆2倍，平板銷量更激增3倍，智能手表亦翻倍，到底呢輪由「以舊換新」引發嘅升浪可以持續幾耐？
信達國際研究部董事趙晞文指，其實今次補貼金額係令市場失望，反觀去年剛推出時嘅補貼金額上限高好多，同今次嘅500人仔差好遠，不過，內地電商平台陸續推出優惠，放大折扣規模，所以政策仍有吸引力，但就變相提早消耗咗部分新春購買力，能唔能夠維持全年增長，就要睇各品牌喺2025年下半年推出旗艦電子產品銷售情況。
晞文又話，小米貴價手機市佔率過去幾年逐步提升，品牌正走向高端化，5000人仔或以上嘅旗艦手機亦唔少，而小米手機喺唔同價位都有好多選擇，因此，預期小米會係今次補貼最受惠嘅品牌。
