【Now財經台】港股新股市場喺過去一段時間明顯熱鬧咗，近期熱爆新股，公開招股超額認購逾6000倍嘅玩具股布魯可(00325)，上星期五(10日)首日掛牌，帶挈抽中嘅「幸運兒」1手賺逾7000元，雖然港股今日(13日)受壓，但布魯可愈升愈有，一度逆市再炒高逾12%，高見95.5元，有望再挑戰「紅底」。另一隻市場睇到實嘅巨無霸新股，內地電動車電池生產「大佬」寧德時代，嚟香港上市又有進展。
據外電報道，寧德時代嚟香港發H股嘅計劃，有意搵摩根大通、美銀及中金等牽頭安排，而且唔排除有再有銀行加入，如果上市計劃順利推進，寧德時代有機會成為本港近年最大型新股。
摩根士丹利曾估計，集團港IPO集資規模或高達77億美元，折合約600億港元。不過，外電最新報道未有提及集資規模及上市時間表等詳情，但至少已再踏出一小步，未來要繼續睇實寧德時代IPO計劃嘅進一步發展。
