【Now財經台】高盛睇好鋁業股前景，其中，將中國鋁業(02600)評級由「沽售」調高至「買入」，因為睇好銅及鋁等工業需求可望受惠於國策。供應鏈方面，高盛估計，鋁土礦或出現供應過剩，不過，若重要產地幾內亞供應中斷，就可能出現逾20%嘅供應短缺，因此，高盛上調2025年嘅氧化鋁價。其實氧化鋁價喺2024年第4季已開始急升，係咪會成為中鋁股價嘅重要催化劑？
艾德金融執行董事陳政深表示，供應方面存在唔少不明朗因素，新國策對鋁價嘅影響，要留意會反映喺工業生產者出廠價格指數(PPI)，PPI自2022年下旬至今一直維持負數，意味上游物價處於收縮狀況，反映需求不足。
Ryan續指，中鋁財務狀況冇太大問題，但市場認為未必會出現高速增長，加上根本性問題仍未解決，所以股價好難扭轉下跌趨勢，佢估計，中鋁股價會長期喺大型橫行區上落，原因係冇足夠催化劑扭轉股價走勢。
