【Now財經台】近期內地科企及車企都有新搞作，包括市傳小米集團(01810)會開發人工智能(AI)大模型，理想汽車(02015)行政總裁最新話，公司變身人工智能(AI)企業，未來100%會開發人形機械人。資金近排主要吼內需股，明年會唔會繼續睇電動車、智能手機呢啲行業？
安柏環球金融集團首席投資總監雷志海指，雖然中央政策明顯係向電動車及AI傾斜，但更重要係，內地市場喺電動車及AI領域嘅吸納量，睇返依家嘅內需市場情況，明顯係有飽和情況，所以會見到內地致力將國產手機大力推向海外市場，但美國及歐洲已經落咗。電動車方面，連巴西、土耳其等同中國關係較友好嘅貿易伙伴，又開始向中國製電動車徵關税，如果中國唔變陣，只會同呢啲貿易倓伴嘅磨擦升溫。AI發展方面，又面對美國針對晶片範疇不斷升級嘅打壓，所以呢方面都係好難取得突破。
不過，John認為，旅遊方面會較容取得突破，內地過去幾個月放寬咗好多國家免簽證，令出境及入境旅客都有增長，因此，佢睇好同旅遊相關內需股。
