【Now財經台】阿里巴巴(09988)第3季電商商品交易總額(GMV)僅增長1%，事實上，近年內地電商愈嚟愈難做，因為市場已經飽和，直播帶貨亦未必可以刺激消費意欲。阿里股價9月24日以嚟嘅升幅早已「化灰」，業績後又被券商削目標價，股價一直跌唔停，今日(22日)更錄得放榜後最大跌幅，一度跌近5%，險守80元，到底呢個位可唔可以繼續守住？
紅蟻資本投資總監李澤銘指，投資者的確要留意阿里守唔守到80元，再向下就係250天線，即77元、78元，阿里第3季業績唔算差，收入符預期，經調整利潤亦略好過預期，展望第4季，有「雙11」加持下，佢相信GMV會顯著增長，加上有「以舊換新」政策支持，阿里收入未必會太差。
展望明年，Alan表示，要留意政策方向及商家補貼會唔會進一步加碼，又指阿里基本因素唔太差，近期股價調整只係跟大市行。
