【Now財經台】內地快遞龍頭順豐控股(06936)今日(19日)開始招股，市傳唔夠半日已錄得足額認購，順豐入場費約7333元，周五(22日)截飛，如果以招股價上限計，會係今年集資規模第2大IPO。此外，今次上市引入10名基石投資者，可以話係星光熠熠，包括小米集團(01810)及信和置業(00083)等，近排大市氣氛唔係咁好，會唔會影響招股反應？
信達國際研究部董事趙晞文指，當冇1個板塊表現特別標青時，就會有部分資金去抽新股，近期個別IPO的確反應唔錯，首掛表現亦唔錯，相信機構及零售投資者都會關注順豐，睇返9月市況唔好，投資情緒亦好悲觀，就有隻新股美的集團(00300)跑出咗，好多人大呻走寶。
佢估計，順豐首掛未必會「潛水」，國際配售反應暫時都唔錯，但亦唔好期望公開招股會超購好多，考慮到近期市況，如果超購約4倍已經唔錯。
