【Now財經台】維他奶國際(00345)今日(26日)中午派咗中期成績表，收入、純利及EBITDA都有得升，放榜前股價反覆向下，午後曾短暫倒升，但之後愈跌愈多，一度低見9.6元，挫近5%，呢份業績似乎畀唔到驚喜市場？除咗業績，維他奶仲有咩地方要留意？
華盛證券財富管理部董事李偉傑指，維他奶業績整體算係唔錯，但驚喜唔算大，近月大股東增持曾經成為市場焦點，所以市場未來唔會單睇業績，亦會留意喺唔同股東增持下，會唔會成為股價更强勁嘅催化劑。
維他奶股價由9月底嘅4元水平，升至現時9元水平，已累升近1倍，呢浸升幅主要因信和置業(00083)家族成員黃志達增持股份，Jason指，現時黃志達持有維他奶近17%股權，如果黃志達持續增持，對股價積極性會相當大，由於黃志達亦係楊協成主要股東，若黃志達增持維他奶係屬於敵意收購，就會令股價變得更波動。不過，市場亦憧憬維他奶同楊協成會有地域上合作，亦可以留意維他奶今日下午嘅記者會，會唔會有更多消息披露。
