【Now財經台】吉利汽車(00175)股價今日(15日)逆市向下，母公司吉利控股昨日(14日)宣布，將會整合旗下兩大新能源車品牌領克(LYNK)及極氪(ZEEKR)，管理層話，今次整合可帶嚟協同效應，以及增加資源利用效率，兩者合併點樣達到協同效應？此外，母公司會向吉利轉讓逾11%極氪股份，交易完成後，吉利持股量將升至逾62%，極氪美股昨晚曾急瀉25%，係咪反映市場不滿整合業務？
紅蟻資本投資總監李澤銘認為，整合後協同效應會比之前好，之前兩個品牌存在競爭關係，雖然控制權方面冇分別，大股東仍然係吉利控股，但整合後領克會變成極氪旗下品牌，喺車型及市場策略上會協調得更好，依家極氪主要走中高檔路線，主攻中大型純電動車，領克就主攻小型平價車款，亦首次推出純電動車，相信可補足極氪市場分布缺失問題，又可以避免同業競爭，有利吉利整體營運。
Alan續指，極氪美股大跌反映市場對今次交易不滿，未來要留意極氪及領克收入和銷量，有冇因為今次整合而增加。
