【Now財經台】「三桶油」股價今日(29日)逆市跌，以上游業務為主嘅中國海洋石油(00883)，以及有下游業務嘅中國石油化工股份(00386)已派咗季度成績表，前者盈利微升，但後者大幅倒退55%，預期表現介乎兩者之間嘅中國石油(00857)，業績交唔交到貨？
亨達財富管理董事總經理姚浩然指，油價呢排偏弱，但整體波動性唔大，所以做上游業務可以保持盈利，但做中下游業務，產品售價就會受壓，主要受內地經濟增長問題影響，由於上季增長比上半年慢，下游需求有機會減少，所以下游業務比重愈大就愈易受拖累。
Patrick續指，中石油上中下游業務都有，佢估計，中石油中下游業務表現唔會太理想，盈利將會微跌，但中石油有天然氣業務，因為成本低咗將會有改善，佢認為，中石油業務表現較中石化強，預期盈利增幅將介乎中海油及中石化之間。
