【Now財經台】喺日本爆紅嘅動漫Chiikawa，最初係日本漫畫家Nagano喺佢個人Twitter(現稱X)發布，跟住就出書出動畫，短短幾年間橫掃整個亞洲，更成為近年有影響力嘅角色IP之一，更造就「Chiikawa經濟」，帶挈商戶及企業喺全球各地狂吸金。
就連香港上市公司名創優品(09896)，都曾經喺又一城開Chiikawa POP-UP Store吸金。Chiikawa產品喺網上更炒到癲，近期一個叫「紅溫兔」，只能經代購買到嘅毛公仔，原價只係逾1000日圓，代購睇準呢個商機，喺本港二手交易平台放售，炒價最高4000港元，但仍有人「接貨」。另一隻叫「哥布林」嘅毛公仔，原價同樣係逾1000日圓，炒價最高880港元，都錄得「成交」。
不過，有熟悉行情人士話，做呢門生意風險好高，因為一旦冧價可以好得人驚。
此外，Chiikawa熱潮亦席捲內地 ，北京及上海今年曾搞過快閃店活動，吸引大量fans排隊，其中，上海快閃店首日喺10小時內，銷售額近300萬人仔。
