【Now財經台】從事機械人業務嘅優必選(09880)，股價昨日(22日)大升20%後，公司就宣布折讓配股集資。值得留意係，Tesla會喺美股今晚(23日)收市後出業績，除咗炒起電動車股外，機械人概念股都受惠，優必選趁市場偷步炒Tesla推升股價，係咪一個「抽水」好時機？
紅蟻資本投資總監李澤銘指，如果作為炒概念股，時機上係配合到，雖然人形機械人有機會係未來發展方向，但市場對機械人相關業務嘅關注度低，加上現時機械人商用化或民用化程度仍非常低，人形機械人喺工業用途方面仍處於概念階段。
佢又話，因為機械人製造門檻低及競爭大，若優必選想要繼續喺呢個賽道同其他公司競爭，「燒錢」做研發係無可避免，不過，選擇銀行融資借貸有一定額度，相信未來繼續配股集資會係優必選獲取資金嘅主要途徑。
