【Now財經台】百勝中國(09987)旗下除咗外界熟悉嘅肯德基(KFC)及必勝客(Pizza Hut)，其實仲有咖啡品牌肯悅咖啡(KCOFFEE)，開店速度亦好快，依家有約300家，目標係年底增至500家，又同意大利咖啡品牌Lavazza組合營，百勝持有65%股權，但呢啲咖啡業務增長近乎零，明顯希望咖啡業務成為另一個增長點，但現時內地「內捲」情況嚴重，百勝嘅咖啡業務似乎好難突圍。
南華金融集團副總裁莫灝楠指，不論肯悅或Lavazza，如果睇返星巴克(Starbucks)喺內地嘅銷售，都跌得幾慘烈，上季內地同店銷售大跌14%，反映咖啡生意都好難做，不過，百勝旗下好多品牌，更重要係可以做到捆綁式銷售，所以業績較穩定。
百勝股價依家喺340元水平上落，現價值唔值博？莫灝楠認為，不如睇下Starbucks新行政總裁未來一兩嘅改革成效點樣，內地業務有冇起色，再考慮買唔買百勝，因為短期仍偏弱勢，所以唔建議買入。
