【now.com財經】今朝似乎大家都嚴陣以待，皆因偉大嘅A股今日返嚟啦！
未開市之前如常的喺作戰室同戰友一齊睇咗個牛熊證街貨圖，見牛證第一層22400至22499點「如常」的變成重貨區，不過今日嘅熊證街貨真係少得可憐，咁樣嘅街貨圖都真係未見過，唯有望一望啲恒指熊實際情況係點。一開先知道平時閒閒地千幾隻嘅恒熊，今日居然得返331隻，呢個量等同於平時嘅騰訊(00700)牛/熊(單邊計)嘅數量，明嘅，個市咁上法講真係我出貨嘅，我後背對沖唔到嘅話，出手指咩?!
無錢搵嘅生意邊個會做？「啱呀！所以今日A股開，北水返嚟，港股仲唔衝多一浸？」好正路嘅真係咁諗，不過喺A股放假嘅時侯，外資已經瘋狂掃貨；好啦，依家A股開市喎，預咗早已開定Account嘅同胞們入場，你諗下佢哋會被視為「接貨的韭菜」定係「無分你我一齊玩」？
作戰室戰友們一齊度咗個「劇本」，恒指今朝開市報22849點，跌250點，作戰室淡倉已經準備追落，當然亦有部份戰友一早儲定淡定忍痛到依家大嗌爽皮啦。
單係第一支燭已經波幅有757點，真係好耐都未見過咁嘅盛勢，第二粒燭雖然一度抽高至跌幅收窄一半咁滯(以跌過千點計)，不過，喺小時圖上見指數已經向下回落到20線以下，作戰室嘅淡倉再出又好，再hold都好，首四層牛證都已經全數死亡，呢度有相當於2010張期指街貨。
10點未到已經見到小時圖Slow STC(14.3)兩線出觸頂，而整條保歷加通道由向上變成橫向，中軸已經串過咗，望望鐘8分鐘之後就到10點，如果指數仍然擺低於中軸嘅話，咁恒指熊(54252)，收回價23250點，同現價有約900點距離，槓桿有約24倍，同一收回價中最高槓桿兼低街貨，就可以出動，下望保歷加通道底線。
但今日除咗A股復市之外，10點有由國家發展改革委員會主任鄭柵潔會聯同四位副主任，介紹「系統落實一籃子增量政策」嘅記者會，指數上上落落過後嚟到依家大約22200點呢個位停一停，似乎都等睇呢個會UM。
姑且都一齊等一等或者放慢少少腳步，不過之前揀嘅淡倉都仲可以用得到，平常心用返保歷加橫行借指數同Slow STC(14.3)向下而出，只係唔好諗住會好似今朝咁向下瀡。
依家10點5分，22000點確認失守，唔阻你出淡倉啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
