【Now財經台】今日(10日)係手機界大日子，兩大品牌蘋果公司(Apple Inc.) 及華為前後腳舉行發布會，Apple嘅iPhone 16系列硬撼華為嘅三摺手機Mate XT非凡大師，不過，對手機設備股冇刺激作用，其中，舜宇光學(02382)及瑞聲科技(02018)午後跌2%至3%，係咪因為市場唔睇好呢兩部新機可以引爆換機潮？
華盛證券財富管理部董事李偉傑指，雖然Apple推出人工智能(AI)功能Apple Intelligence，但卻令市場失望，因為連美國用家都要等到10月先用到AI功能，意味Apple未準備好就已急急推iPhone 16，時間點上同市場預期有落差，部分海外用家更要明年先可以用到AI功能，就更加唔使咁心急換機。
華為方面，雖然三摺機Mate XT新奇兼有好大吸引力，但因為仲未披露定價，市場估計，可能索價2萬元，因此，呢兩部機嘅發布會似乎都唔可以令換機潮發酵。
Jason續指，由於Apple及華為嘅賣點都唔係手機設備升級，所以舜宇及瑞聲股價食唔到個氣氛炒上去。
