【Now財經台】新世界發展(00017)發盈警後，股價今日(2日)插水，收市重挫近13%，收報6.83元，集團預告全年最多蝕200億元，近期市傳新世界旗下K11 Art Mall，獲中資以90億元洽購，摩根大通認為，呢個價錢吸引力較低，如果真係用呢個賣K11 Art Mall，反映集團流動性壓力比預期大，可能不利其他資產出售時嘅估值，到底新世界賣K11 Art Mall機會大唔大？會唔會影響公司派息？
博威環球證券金融首席分析師聶振邦指，新世界嘅虧損都比較大，估計之後會減少派息，但公司積極減債，可望紓緩財政壓力，亦有助集團收支平衡。另一方面，市傳集團有可能出售核心資產K11 Art Mall，但K11係新世界好主要嘅品牌，所以賣K11 Art Mall仍然有不確定性，聶Sir相信，除非新世界有好嚴重嘅財務問題，否則，相信集團仍會等美國啟動減息周期後，先會做出售資產嘅部署。
