【Now財經台】今個星期一(5日)全球冧市，亞太區股市以日本及台灣股市「災情」最嚴重，港股表現相對硬淨，之後受內地數據帶動，恒生指數出現反彈，到底內地經濟下半年形勢係點？港股又應該點部署？
冠域商業及經濟研究中心主任關焯照認為，內地跟本港經濟融合已有一段時間，全球冧市當日港股冇受外圍明顯著拖累，除咗內地數據帶來支持外，亦因為港股之前已跌咗唔少，削弱外圍嘅殺傷力，加上臨近業績期，港股亦借一啲外圍利好因素反彈。
至於內地下半年經濟表現，關博士認為唔會太理想，但今日(9日)出爐嘅7月內地居民消費價格指數(CPI)好過預期，反映通縮情況有改善。
投資部署方面，關博士指出，投資者要見機行事，進取型投資者可以考慮押注ATM業績，佢就睇好阿里巴巴(09988)及美團(03690)。至於恒指預期會喺19000點見頂，短期會繼續喺16000至17700點上落。
