【Now財經台】餐飲股味千中國(00538)發盈警，預告中期轉蝕最多2000萬人仔，去年同期就賺1.3億人仔，主要係門店客流量下降導致同店銷售倒退，以及投資錄得虧損。味千股價今朝(5日)低開5%後，跌幅一度擴大至逾20%，低見0.78元，半日收市仍跌逾17%，報0.81元。
不過，味千疫情期間，即使業績虧損仍有派息，2020年時維持派兩次息，而2022年起就只派末期息6.8仙。去年回復盈利後，末期息增長至派8.6仙，當時用咗約9387萬元。截至去年底止，味千手頭現金有16億人仔，可能仍有空間維持派息來挽留投資者，如果今年底派息按年持平，股息率仍高達10厘。
技術上，味千股價跌穿咗0.9元嘅約250天線水平，14天相對強弱指數(RSI)落到20樓下嘅嚴重超賣水平，股價依家已初步反映盈警，8月公布業績時派息情況會係股價後向指標。
