【Now財經台】味千(中國)(00538)發盈喜，預告中期轉賺最多1.4億人仔，味千股價今早大升，一度高見1.19元，勁升逾22%，除咗復甦概念，味千其實都係1隻「叠水股」，截至去年底止，持有現金逾14億人仔，基本冇乜負債，疫情期間只係停派1次中期息，可以預期公司有錢賺派息都會慷慨啲，依家大股東兼主席持股47%，一定會受惠派息，但私有化會唔會更啱管理層胃口？
《香港股票財技密碼》作者梁杰文指，味千幾乎係一家淨現金公司，要維持疫前派息水平及派息率完全冇難度，依家重新上返賺錢軌道，唯一要用錢係開新店，要使嘅錢都只係1億至2億人仔，而集團的確有私有化潛力，至少市值相對現金水平仍算低。
Mike又話，味千市值比較細，市場亦有一個心理陰影，就係疫情令公司生意唔太理想兼股價大跌，到底幾時先反映到公司價值，可能都需要一段時間，雖然上半年發咗盈喜，但市場都想觀察下全年利潤追唔追到疫前水平，估值先可以逐步收復。
