【Now財經台】截至早上11時止，1小時內《彭博》搜尋量最多首5隻港股，依次為新世界發展(00017)、越秀地產(00123)、李寧(02331)、美高梅中國(02282)、中國石油化工(00386)。
美國聯儲局議息後，市場因主席鮑威爾(Jerome Powell)「放鴿」而憧憬最快9月減息，但對息口敏感嘅本地地產股今朝(1日)普遍靠穩，其中，新世界發展昨日(7月31日)曾跌至近8年低位，低見6.91元後，今朝輕微低開後，回升靠穩，半日升近1%，報7.35元。
近期新世界股價持續受壓，相信最大原因係投資者憂慮喺高息環境下，集團龐大嘅債務規模衍生嘅利息支出會令現金流出現問題。即使而家有減息利好，本地樓市嘅情況仍然拖累集團股價。
不過，椽盛資本投資總監曾永堅認為，新世界近年積極改善貸款結構，而最近出售非核心資產，加上啟德新盤柏蔚森開售，都有助集團繼續去槓桿。
Jaseper續指，未來要重點關注新世界嘅賣樓策略，即使可能要劈價吸客，如果能借助息口回落而吸引到潛在買家，就可以保持到一定速度套現。
