【Now財經台】北京就自動駕駛網約車服務推出指導意見，由於百度集團(09888)食正自動駕駛條水，刺激股價昨日(10日)大升10%，股價今朝(11日)高開後，反覆向上，一度高見96.45元，升1.5%。百度股價昨日急升，CALL輪或PUT輪嘅窩有冇拉高咗？如果依家入場會唔會買貴咗？
滙豐亞太區財富管理香港上市產品銷售經理盧貴良指，百度股價昨日大升，引伸波幅都由33點子抽升至40點子，如果可以睇準時機開CALL，回報都幾可觀。佢又話，現時可以考慮用牛證做好倉部署，因為唔會受引伸波幅影響，收回價可以睇82元水平，即今年股價低位，實際槓桿約6倍。
