【Now財經台】截至早上11時止，1小時內《彭博》搜尋量最多首5隻港股，依次為波司登(03998)、路勁(01098)、康方生物(09926)、中國石油化工股份(00386)、中國銀行(03988)。
波司登主席高德康昨日(3日)折讓逾9%，配售4億股，套現逾17億元，拖累股價曾急瀉18%，插穿配售價4.31元。不過，高盛出報告唱好，話波司登揀咗幾十個優質投資者，當中有長線投資者、對沖基金，而主席承諾1年內唔減持，亦多過一般90日嘅做法。結果波司登股價今朝(4日)高開，半日最多升逾5%，高見4.24元。
椽盛資本投資總監曾永堅表示，公司趁港股爆抽水潮配股，股價短期難免受壓。不過，主打羽絨服嘅波司登基本面唔錯，近年收益、毛利率、庫存周轉日數等指標均見改善，加上新開拓嘅防曬衫產品線賣得幾好，亦有助補足集團夏天嘅盈利基礎，料未來兩年嘅盈利將維持雙位數增長。
Jaseper續指，現時股價有望企穩3.9元水平以上，預測市盈率(PE)約11倍，相信吸引到中長線投資者入場。
