【Now財經台】世界人工智能大會(WAIC 2024)今日(4日)喺上海開幕，AI相關股今朝表現搶鏡，其中，百度集團(09888)高開1.6%後，升幅一度擴大至近3%，高見88.5元，其後升幅收窄。截至昨日(3日)止，最少連續5日有資金流入百度，昨日再有逾百萬元，資金今朝有冇繼續追入好倉？還是反手造淡？
星展香港環球金融市場上市產品主管周國威指，其實百度過去一段時間都有唔少消息，包括有機會同蘋果公司(Apple Inc.)及Tesla合作嘅傳聞，但炒咗一轉就無以為繼，股價甚至反覆向下，但跌到現水平資金開始做好倉部署，繼續博百度好倉。產品方面，貼購輪選擇唔多，唔少價外逾30%，所以百度CALL宜揀較長身，例如2025年第1季到期，對沖值介乎10%至30%，槓桿6倍至7倍。
