【Now財經台】Nike喺美股昨晚(27日)收市後出咗季績，截至5月底止第4季度，多賺逾45%，每股經調整盈利亦高過預期。但集團指估計大中華區今季收入跌10%。值得留意係，巴黎奧運將會喺7月底開幕，點解有奧運效應，集團仍期收入會跌？主要賣Adidas、PUMA、Nike嘅滔博運動(6110)又會唔會受到牽連?
紅蟻資本投資總監李澤銘指，Nike出現呢個情況係因為內地銷售疲弱，雖然商家喺「618電商購物節」奇招盡出，但整體總商品交易額(GMV)仍然冇起色，佢又話，內地零售銷售嘅下滑速度喺4月至6月開始加快。
Nike銷情差，主要賣Adidas、PUMA、Nike嘅滔搏(06110)銷情都唔好得去邊，其實集團近幾季增長持續向下，情況係咪冇咁快見底？Alan認為，滔搏都要捱一段時間，因為公司代理嘅品牌都受消費壓力影響，加上門市太多分薄客流量，雖然線上平台有幫助，但要減價先夠競爭力。
佢續指，距離巴黎奧運開幕僅1個月，但運動板塊仍未炒起，相信奧運對銷售有幫助，但仍要靠商家推出折扣優惠才可吸引顧客。
