【Now財經台】歐舒丹(00973)昨日(24日)收市後派咗全年成績表，表現差過預期，截至3月底止全年，按固定匯率計，收入25億歐元，增長19%，純利跌逾18%至9389萬歐元，遜預期。按地區劃分，只有亞洲嘅收入要跌。集團4月底宣布私有化，日前嘅股東特別大會逾99%贊成，跟私有化要約有關嘅出售股份交易，距離截止仲有兩個月時間，有貨係咪應否坐到尾？
信達國際研究部董事趙晞文指，歐舒丹以往會單獨披露內地市場數據，但今次冇公布，可能隱藏咗一啲潛在憂慮。佢又話，疫後復常之後，亞太區喺咁多地區中增長得最快，但隨著基數愈來愈高，上個財政年度收入下跌，其實係可以理解。
晞文續指，主席Reinold Geiger提出私有化後，相信股價會一直企喺高位，波幅唔會太大，加上通過有關議案機會好大，投資者不妨坐多兩個月，收多1元。
