【Now財經台】商湯(00020)股價自4月上市低位，即0.58元反彈至現水平，累升逾1倍，集團開市前出咗通告，計劃配售約16.7億股新B類股，配股價1.2元，較昨日(20日)收市價折讓約9%，集資淨額近20億元，主要用嚟支持生成式人工智能(Generative AI)進一步發展，到底商湯AI業務值唔值得憧憬？
博威環球證券金融首席分析師聶振邦指，AI已經係全球焦點，如果要喺AI算力上具競爭力，一定要投放大量資金做科研，由於商湯股價已上返正常水平，所以今次配股唔會對股價構成好大壓力。
聶Sir又話，商湯股價暫時喺1.15元至1.35元徘徊，當市場消化完配股消息，又或者集團之後再推出新產品，都會對股價有提振作用，短線仍可以睇得樂觀少少。
