【Now財經台】聯想集團(00992)股價5月底突破12元後，開始有阻力，股價出現回調，今日(7日)更急挫，喺20天線爭持，聯想股價早前受推出人工智能(AI)電腦消息帶動，表現唔錯，今日明顯下跌，多不多投資者部署好倉博反彈？成交活躍嘅CALL大部分12月到期，行使價約13.5元，高過今年高位，又可唔可取？
法興銀行證券上市產品銷售部董事周翰宏指，聯想股價近期較強，尤其上月底突破11元關口後，出現兩支大陽燭，其後反覆回落，暫時見唔到有明顯反彈動力，但今日仍有唔少資金博反彈，揀較價外嘅CALL，主要係早前股價強勢，曾高見12.2元，所以行使價13.5元嘅條款唔算特別價外，但隨著股價回落，一旦股價跌至10元水平，行使價13.5元已價外30%，建議考慮揀行使價較低嘅CALL。
