【Now財經台】截至早上11時止，過去1小時內《彭博》用戶搜尋量最多港股，依次為中國銀行(03988)、龍湖集團(00960)、美高梅中國(02282)、舜宇光學科技(02382)及聯想集團(00992)。
陸家嘴論壇今日(19日)開幕，中證監主席吳清指，要大力推動上市公司提升投資價值，進一步引導企業積極回報投資者，內銀一向係高息回報之選，加上憧憬四大內銀將會首度派中期息，係咪有助提升內銀H股吸引力？四大內銀中，中行係咪首選？
資深證券分析師彭偉新認為，內銀股經常有好大折讓，主要係派息時間太長，1年先派1次，例如3月底出業績，但要到7月底，甚至8月先收到股息，變相每年都要跨年等派息，令中線投資者卻步，股價自然落後，折讓亦相對大。
佢又指，中證監喺陸家嘴論壇嘅言論，或會令內銀調整派息政策，進一步縮短派息時間表，繼而推動內銀股價。
揀股方面，彭偉新認為，現時中行息率約6厘，預期股價短期上升空間會較大。
