【Now財經台】接連有科網股發可轉換優先票據(CB)集資，呢股「抽水潮」最新蔓延至旅遊股，攜程集團(09961)擬發13億美元CB，最多可加碼2億美元，換股價每股美國存託股(ADR)66.46美元，較昨日(4日)收市價有逾32%溢價，集資用嚟還債、拓展海外業務及營運資金。近期接連有大型企業透過發CB，向市場「伸手」攞錢，還是趁大市氣氛好而未雨綢繆？
南華金融集團副總裁莫灝楠指，發CB成本低，即使股價唔升，都可以集到平錢，股價5年升逾10%唔會好難，博股價升到換股價其實好易，即使發咗CB後，要喺高位換股畀投資者，其實等於畀咗個希望市場，管理層或投資者都係睇好股份可以升到呢個價先出手，因此，Casper認為，要睇返CB投資者實力，如果引入到基金投資者，全部都係實力雄厚，甚至可以為公司帶來更多資源，短期睇落好似稀釋咗股價，但其實都幫到公司融資，甚至帶嚟更多生意。
Casper又話，CB本身屬於中性，唔使視為洪水猛獸，若投資者好有實力，股價好易炒到上去，雖然短期利淡，但中長期仍偏向利好。
