【Now財經台】港股近日持續向下，恒生指數3日累跌逾700點，昨日(23日)更插穿10天線，失守19000關，20天線係咪危危乎？港股之前嘅升勢全靠新經濟股帶動，但值得留意係，繼京東集團(09618)後，又輪到阿里巴巴(09988)發可換股債券(CB)，呢個情況會唔會拖累港股表現及投資氣氛？
博威環球證券金融首席分析師聶振邦指，恒指今日(24日)的確有機會下試20天線，要留意18500點有冇支持，如果守得住反映整體升勢仍未被破壞，相反，4月以嚟嘅升浪可能會結束。
聶Sir又話，要留意未來會唔出現一個發CB浪潮，如果陸續有大型科技股跟隨，就會令港股沽壓更明顯，亦要關注國策，如果再有救內房及谷零售政策推出，後市可以睇得樂觀啲，如果冇呢啲消息，投資者就會傾向獲利離場。
