【Now財經台】聯想集團(00992)今日(23日)中午派出成績表，全年少賺逾37%，收入亦跌8.2%，不過，單計第4季，收入增長9%，純利就升逾1倍，毛利率更創新高，第4季一向係淡季，如果同上半年比較，下半年業績係咪已經見底？聯想個人電腦(PC)去庫存壓力已紓緩，係咪可以重拾增長動力？
香港股票分析師協會主席鄧聲興認為，聯想下半年業績相對理想，睇返今年首9個月業績，營業額跌逾12%，利潤更大跌近49%，不過，全年埋單計，睇到下半年明顯有改善，而去庫存工作已差唔多完成，主要係之前受疫情影響，唔少人要在家工作，帶動PC需求突然大增，令出貨率錄得雙位數增長，不過，疫情過後唔需要再添置咁多PC，因此，去年上半年及2022年底PC需求明顯減少，但相信呢啲季節性因素，已經喺去年第4季逐漸消化。
