【Now財經台】內地5月批出96款國產網遊版號，雖然網易(09999)冇份，但集團昨日(20日)有逾40款遊戲亮相，花旗引述管理層指，依家集團嘅產品線合共有54款遊戲，其中20款已獲批，花旗指，由於網易遊戲產品線豐富，可推動未來幾年增長，焦點遊戲包括《永劫無間》及《燕雲十六聲》，前者電腦版已推出3年，亦幾受歡迎，手遊版預先登記玩家已逾2520萬，網易新遊戲對推動增長有幾大幫助？
華盛證券財富管理部董事李偉傑估計，網易增長同騰訊控股(00700)差唔多，網易新一季主打派對遊戲，性質較平和，亦冇咁血腥，但玩家大部分偏好較刺激嘅遊戲，因此，預期新遊戲可以保持收益，但未必可以帶嚟強勁收入，由於《永劫無間》及《燕雲十六聲》都係好受年輕人歡迎嘅高質遊戲，所以市場都遊戲今季推出後，集團能回復理想增長寄予厚望，加上網易早前跟暴雪娛樂(Blizzard Entertainment)「復合」，會令市場有另一個憧憬。
股價方面，Jason指出，由於市場對網易業績冇太大期望，估計網易周四(23日)放榜後，股價會喺150元至160元水平調整。
