【now.com財經】上個星期五(5月17日)揀咗隻恒指牛(58161)出嚟，平均買入價為0.034元。喺上半場11點45分至下半場1點25分，見Slow STC(14.3)兩線上到80以上超買位置，喺呢段(58161)已經可以離場。
按期內(58161)高低位做過0.043元/0.035元計，平均走貨價為0.039元，即平均有5格/14.71%落袋。
上個星期明明日日都好天氣，不過去到星期日就開始落返雨，噚日嗰場雨真係由下晝一直落到夜晚，傳說中嘅「長命雨」。
恒指由4月中低位16,044點，60度角方式向上衝至上個星期五高位19,602點，累升3,558點，坦白講大家都開始擔心會同個天一樣落起「長命雨」。
不過，今日指數完U後見升67點，報19,621點，再創自去年8月以來新高。及至正式開市，喺初段時間見指數向上升過百點，依家9點34分，指數一度高見19,664點，Keep住咁day high & N個月高位。
作戰室今朝都先用好倉應戰，但都講到明開市初段時間係會比較chok，又處於高位向下借線都比較遠，所以都只好Keep住數住格仔，有咩事即刻四散。
至於睇呢篇文借小時圖嘅你，依家9點38分，暫時指數仍然處於10線之上，連埋保歷加通道睇嘅話，指數由5月9日下晝重上10/20線之後至今，一直都處於保歷加頂線&10線之間慢慢向上運行，保守嘅方法當然係等返指數回返落去10線企穩之後先至出好倉再順依家個勢追上去啦；進取嘅同作戰室一樣，借19,600點呢個位做下方量度線都可以嘅。
依家9點50分，見指數喺五分鐘圖開始同10線靠近，準備借線啦！
「咁樣即係揀恒指牛啦？」Yes！不過，依家市場上最貼價嘅恒牛，收回價見19,115點，同現價有逾500點距離，都唔緊要，最麻煩嘅係街貨好高，所以揀嘅時侯要避開高街貨嘅恒牛，如街貨低於20%、但槓桿月約39.24倍，為市場第二高槓桿嘅(58220)，收回價19,115點，同現價有約506點距離。
另外，留意返上個星期五收市後恒指服務公司公布咗新一個季度嘅檢討結果，比電(00285)同紫金(02899)分別入咗恒指同國指，科指就維持原狀。呢兩隻本身都係喺可發行輪證嘅list裡面嘅，只不過目前唔係有好多嘅選擇(好似得輪，比電連Put都無)，炒染藍嘅朋友如果想借窩輪槓桿做部署嘅話，碌大隻眼睇清楚啲條款呀。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
