【Now財經台】截至早上11時止,1小時內《彭博》用戶關注度上升最多港股,依次為長城汽車(02333)、世茂集團(00813)、永利澳門(01128)、碧桂園(02007)、藥明生物(02269)。
據外媒報道,長汽計劃喺匈牙利設廠研發新能源車,股價今早(13日)一度升8%,高見13.5元,跑贏其他車股,衝上逾年半高位,長汽新能源車1月至4月銷量佔整體22%,其中,海外銷量佔近35%,不過,主席魏建軍上周五(10日)預期,行業未來3年競爭持續激烈,加上美國及歐盟不斷推出針對內地電動車嘅打壓措施,點睇股價前景?
博威環球證券金融首席分析師聶振邦指,長汽設廠消息配合國家主席習近平近日出訪匈牙利,的確可以提振股價,雖然歐盟有機會啟動針對內地新能源車嘅調查,甚至制裁,而美國已率先出手,的確不利內地新能源汽車喺海外市場嘅發展,不過,屬於東歐嘅匈牙利市場應可「避過一劫」,所以市場對消息嘅解讀仍唔算負面。
聶Sir又話,長汽股價上月累升逾37%,5月暫時累升逾11%,加上市盈率(PE)僅約10倍,相信股價仍有上升空間,後市有力上望14.5元至15元。