【Now財經台】截至早上11時止，1小時內《彭博》用戶搜尋量最多港股，依次為太古股份公司A(00019)、新世界發展(00017)、世茂集團(00813)、普拉達(01913)及思捷環球(00330)。
太古旗下太古地產(01972)股價持續強勢，反觀另一隻地產股新世界弱勢，股價今日(26日)又破底，一度低見7.1元，近期二手成交跌至2月以來最少，中原城市領先指數(CCL)「撤辣」後升幅亦幾乎「化灰」，點解兩隻股份走勢咁唔同？
資深證券分析師彭偉新指，負債高嘅地產股股價都偏弱，當中包括新世界，雖然集團過去半年盡力減債、出售非核心業務予母公司，甚至減持一啲未必可以帶來協同效應嘅項目，但市場仍覺得新世界債務負擔大，導致股價一直偏弱。
Castor又話，由於中環等傳統寫字樓供應量仍十分充裕，市場預期，不論估值、租金收入都會受影響，太古過去逾10年主攻中環以外地區，例如灣仔、金鐘太古廣場，減少受「非中環化」影響嘅租金收益，所以整體表現唔錯。
佢又話，揀地產股時要留意公司手上有冇充足現金流，同未來收益會唔會出現斷層。
