【Now財經台】趁高「抽水」嘅B仔股科倫博泰生物(06990)，股價今早(8日)平開後，一度跌逾4%，其後掉頭向上，曾升近5%，高見168.9元，尾市升幅收窄，收市升逾2%。
科倫博泰今次配股合共籌約12億元，但集團去年7月上市已集資約14億元，上市唔夠1年又再集資。
此外，集團有兩款核心藥物正在研發中，業績曾提及可能最快今年下半年獲內地監管局批准上市。另一方面，公司跟另一家藥廠Ellipses合作研發醫治細胞肺癌嘅主要產品，6月3日會在美國臨床腫瘤學會年會展示最新臨床數據。
股價方面，科倫博泰上述呢啲正面消息，一定會令投資者有憧憬，但要留意集團上市至今，股價已累升逾1.7倍，今次喺高位配售，要留意會唔會為股價帶嚟壓力。
