【Now財經台】渣打集團(02888)今日(2日)中午派咗首季成績表，大部分指標都交足功課，除稅前利潤、經營收入及淨息差(NIM)都超預期，營業支出都比市場預期少，如果要挑剔，就係普通股一級資本充足率(CET1)低過市場預期，加上信貸減值按年增加，集團指，部分強勁勢頭被按揭收入減少所抵銷，呢項業務喺信貸減值嘅佔比最大，會唔會成為渣打未來嘅隱憂？
耀才證券研究部總監植耀輝指，渣打呢份業績令市場有驚喜，刺激股價午後大升，放榜前大行對渣打業績比較審慎，預期利潤會輕微倒退，但最終各項指標都達標兼好過預期，雖然市場或會擔心銀行股嘅淨息差問題，但渣打業績已交足功課，令市場十分滿意。
Stanley又話，渣打今季按揭收入同去年同期比較大幅倒退約30%，按季比較就大幅反彈約80%，但佢估計，渣打按揭收入未來都唔會太理想，不過，由於財富管理等業務表現唔錯，好大機會可以抵銷按揭收入減少嘅影響。
