【Now財經台】港交所(00388)將於下周三(24日)出首季業績，由於首季IPO集資額只有47億元，市場都對港交所呢份成績表冇乜憧憬，係咪意味呢份業績都冇乜參考價值？市況低迷，加上金融業裁員消息沒完沒了，情況係咪都令人憂慮？
南華金融集團副總裁莫灝楠指，港股成交低迷，IPO又冇乜大Deal，雖然令市場對港交所業績睇得相對悲觀，但其實對股價影響唔大，佢又話，其實港交所業績都冇乜參考價值，因為每日都做緊生意，不論是倫敦金屬交易所(LME)或港股IPO，自己都可以計到數。
Casper估計，金融業裁員情況會持續一段時間，因為市況欠佳時，銀行高層豐厚嘅薪酬會加大成本壓力，因此，投資銀行或零售銀行都有唔同程度嘅裁員行動，除非有突發事件，例如美國解除金融封鎖、中美關係緩和，呢啲消息先會對本港金融市場有實際幫助。
