【Now財經台】歐洲銀行股指數已連升6個季度，主要受惠於央行減息憧憬、銀行股估值平、企業回購及派息等因素。至於港股「退休3寳」中嘅滙豐控股(00005)，股價連日刷新52周高位，而罕有做回購嘅恒生銀行(00011)，亦喺今日(10日)啟動30億元回購行動。歐洲銀行股喺第2季，以至下半年都可以繼續睇好？
黃國英資產管理董事黃國英指出，依家係一個焗投資嘅年代，因為市場認為人工智能(AI)嘅發展，可能喺未來幾年威脅就業，加上股市多咗人「圍爐」，散戶參與度高咗，相信呢個趨勢會持續一段時間，可以視為係迷因股GameStop(GME)翻版，但整體會比較有「文路」。
英Sir又話，歐洲股市昨晚(9日)回得比較急，尤其係軍工股，估計銀行股短線會有獲利回套，回一回，長遠而言，睇好銀行股嘅理據仍然成立。佢續指，比較鍾情西班牙銀行股，因為當地旅遊經濟較多，加上市場睇法都係偏淡，相信長遠估值修復空間會較大。
