【now.com財經】噚日揀咗隻恒指熊(61656)出嚟，喺上半場時間出貨平均買入價為0.0505元；及至下半場開始之後，本諗住以時間換格仔，所以喺1點10分見指數上返保歷加中軸之後都無掉走隻淡倉，如噚日嘅【輪證下半Part】所指，只要保歷加通道口保持橫行，甚至收窄，博指數同Slow STC(14.3)上到頂線或超買時出觸頂向下，咁淡倉就可重重生。
真係有發生架，因為喺1點25分之後指數連保歷加頂線都未掂到就已經出上影線，再比多五分鐘指數重新走番落去保歷加中軸以下水平。換一換平均線的話，則發現指數於午前踩過第一次50線，午後返嚟算是今日第二踩，但都係唔過線，懶得再守的話，呢個位就當係(61656)嘅Exit位。
以1點35分見指數踩線唔穿起計，如常用10分鐘作為走貨時間的話，期內(61656)高低位做過0.052元/0.049元，平均走貨價為0.0505元。呢一趟唔計手續費嘅話，打和~ Super~
今朝一開電視睇到佐敦發生三級火警，畫面見消防員架起雲梯來來回回咁喺窗口救出被困嘅居民；洪水橋火警未平，佐敦三級火又起。喺準備開市前收到消息...唉...RIP。
恒指今朝開市升97點，報16,926點，呢口價開出嚟擺到明係再戰17,000點，所以作戰室今日第一注都係開出好倉，先爬第一轉先。
知道呢度係睇開小時圖，但今日想睇咗個日線圖先。日線圖上見由3月12日至今指數被150線算是頂咗三次之後，今日暫時(@9點38分)計，指數擺位終於高過條150線，但又咁講喎，條線其實係向下嘅，單純用點數去量度嘅話，索性拉住17,000點呢口價做阻力位都無人話你錯。如果喺日線圖上面畫返之前一直都有畫住嘅「上升通道」同埋近月嘅「下降通道」，就會見到暫時指數個位有少少尷尬因為指數困於「下降通道」頂線外同「上升通道」底線外，阿市會係爬返上去定重新再向下落？應該都要再比啲時間佢啦。
10點未到恒指已經企咗上到17,000點樓上，暫時高位見1704X點，比噚日嘅高位還要高。
恒指牛(54760)，收回價16,600點，槓桿有約38.52倍，五分鐘圖見指數都已經上到好高，等指數稍回落返去踩線先入勝算比較大。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
