【now.com財經】噚日隻恒指牛(54760)持貨個零鐘平均執10格或19.61%，其後下半場指數如同橫行般無乜分別，提早收工都都無乜損失。
不過，噚日恒指企到上17,100點樓上收市，又真係有啲驚喜，擺位上仲靠近熊證街貨層添。但今日如果開個牛熊證街貨圖出嚟嘅話，就會見到首四層熊證已經儲到滿滿街貨，呢四層裡面有三層嘅街貨量都係過千張期指。BTW，近10層熊證街貨List出嚟條數，括號裡面都係正數，即係較噚日計街貨數量層層都有增加。
至於牛證方面，除咗首三層街貨之外，其餘的都會見到個括號裡面見負數，即係代表街貨量比噚日有所減少，直接啲就係見指數上17,100點樓上囉，好倉仲唔割禾青，等咩呀？
恒指今朝開市先跌282點，開市報16,856點，一下子將指數回近熊證街貨打到落去入第一層牛證街貨層，雖然係咁，不過其實對牛證一啲影響都未有，事關喺16,800至16,899點呢度只係得一隻牛證，而個收回價就正正喺16,800點。依家9點54分，恒指目前低位就等如開市價16,856點，以56點之力保住呢一隻有50%街貨、相當於200張期指街貨嘅牛證。
嚟到10點，指數雖然開局後見低開高走，但暫時都係高走返去17,000點附近就開始見阻力，日線圖見指數目前架於150線中間，有少少動彈不得，呢啲位先至最麻煩，出好倉又見佢頂住嗰高位未有多一口氣嘅力去高衝；比淡倉嘅話又如之前所指定住喺高位唔落。
連小時圖依家10點8分見指數處於10/20線之間，Slow STC(14.3)雖然向下但指數實在唔落；阿市...你係咪嬲咗我哋呀？
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
