【Now財經台】內地3日清明節假期完結，期內，本土遊客出行花費達539.5億人仔，較2019年增長逾12.7%，人均消費數字更首次超越疫情前水平。
不過，今個假期內地人似乎傾向短線遊，據攜程集團(09961)統計顯示，熱門出發地及目的地主要集中在高鐵20分鐘車程嘅地方，同時內陸機航班數量少過比元旦、春節假期，係咪因為消費降級而令民眾放棄長途旅行？
博威環球證券金融首席分析師聶振邦表示，清明去祭祖多數係短線旅程，單以3日數據嚟判斷出遊結構改變係言之尚早，加上今個假期以短線遊為主，但人均消費倍增，令人憧憬「五一黃金周」長假期旅遊消費繼續強勁復甦，相信短途定長途行程都有市場。
聶Sir續指，攜程集團、同程旅行(00780)兩隻同系分別受惠於長線遊及短線遊，如果想提前部署「五一黃金周」短途遊市場出現爆發式增長，可以考慮經營本土旅遊為主嘅同程。中長線而言，市值較大嘅攜程會受惠資金流入旅遊股板塊。
