【Now財經台】軟件即服務(SaaS)股微盟集團(02013)去年收入按年大漲21%至22.27億人仔，虧損亦由2022年嘅19億人仔大幅收窄至7.61億人仔。
不過，業績公布後過埋復活節長假期，集團股價今日(2日)逆市急跌最多17%，創1.59港元嘅上市新低。信達國際研究部董事趙晞文預期，短期出現輕微超跌反彈後，股價或會繼續摸底。
點解業績有改善，微盟今日仲要大成交下急跌？趙晞文認為有兩大原因，首先收入增速遠低於市場預期，佔集團收入約60%嘅訂閱解決方案業務，去年僅按年增長4.5%。佢續指，經營環境轉差下，作為主要客戶嘅中小型企業更審慎投放資源，或因此決定延後投資唔保證回報嘅SaaS服務，並拖累去年收入增長放緩。雖然微盟管理層話今年有望扭虧為盈，但市場質疑集團未必能夠維持收入雙位數增長。
趙晞文續指，「致命傷」係獨立核數師喺財報中點明微盟現金流狀況嚴峻，並提到6月初就有一批逾14億人仔可換股債券(CB)到期，而集團手上「頭寸」唔算充裕，令市場擔憂集團屆時未能順利還款。
