【Now財經台】中國宏橋(01378)去年多賺31%，若拆開上下半年睇，去年下半年純利較上半年大增逾2倍，派末期息29港仙，按年倍增，連同中期息全年派63港仙，按年增加23%，相信係股價炒起嘅原因，雖然派息增幅唔及全年基本盈利增幅，但市場係咪仍睇好派息前景？宏橋股價今日勁升逾13%，後市有仲有冇水位？
博威環球證券金融首席分析師聶振邦認為，今次全年派息有計及特別息，所以相對2022年係明顯較好，但相對2021年嘅派息，今次其實唔算派得好多，市場對股息增加算係有一個正面解讀，但未必好關注股息未來會唔會加碼，始終都係靠特別息撐住，如果明年唔派特別息，全年股息可能會縮水，相信市場主要關注業績及盈利增長可唔可以持續，推高股價表現。
聶Sir又話，股價依家已落到大概去年2月嘅水平，如果保守少少可以留意9元水平，但潛在升幅未有10%，佢又建議可以考慮喺8元至8.2元水平吸納。
